Në mbledhjen e fundit të Këshillit Bashkiak të Vlorës, u hodh poshtë kërkesa për ndërtimin e një parku fotovoltaik në zonën e Kaninës, ndërsa u miratua projekti për një kompleks sportiv dhe rezidencial me kulla në qendër të qytetit.
Kryetarja e këshillit, Elpiniqi Mërkuri, sqaroi se kërkesa për parkun fotovoltaik në një sipërfaqe prej 831 hektarësh nuk mund të miratohej, pasi Bashkia nuk zotëronte titull pronësie për tokën në fjalë. Sipas saj, dokumentacioni i kadastrës dëshmon vetëm për një vërtetim si truall në emër të bashkisë, por jo akt pronësie.
Debatet më të forta u nxitën nga prezantimi surprizë i një projekt-propozimi për zhvillimin e kompleksit sportiv të qytetit, që përfshin stadiumin, pishinat, pallatin e sportit dhe ndërtimin e kullave për banim. Interesi për këtë projekt është shprehur nga Korporata Shqiptare e Investimeve, ndërsa më parë ishte premtuar nga Fondi Shqiptar i Zhvillimit.
Përfaqësuesit e opozitës në këshill ngritën shqetësime për ndikimin që ky zhvillim mund të ketë mbi banorët e zonës, veçanërisht ata me prona në proces legalizimi, duke paralajmëruar pasoja të mundshme sociale dhe zhvendosje.