Operacioni kombëtar për rivendosjen e ligjshmërisë në territor po shtrihet me intensitet në zonat rreth Tiranës, ku autoritetet synojnë goditjen e ndërtimeve pa leje, tejkalimeve të lejeve ekzistuese dhe strukturave të ngritura për qëllime fitimi në shkelje të rregullave. Ndërtues, mbikëqyrës dhe inspektorë që kanë shkelur kushtet e lejeve të ndërtimit do të përballen me masa të ashpra administrative dhe penale.
Ministrja e Punëve të Brendshme, Albana Koçiu, gjatë inspektimeve të zhvilluara sot në Farkë, paralajmëroi se çdo devijim nga leja e ndërtimit do të ndëshkohet me gjobë, kallëzim penal dhe prishje të menjëhershme të objektit.
Sipas saj, kontrollet e deritanishme kanë treguar se abuzimet me territorin nuk lidhen vetëm me individë që ndërtojnë pa leje, por shpesh burojnë nga mungesa e përmbushjes së detyrës nga punonjës publikë.
“Askush nuk do të mbrohet nga pozicioni që mban kur bëhet fjalë për zbatimin e ligjit. Masat po shtrihen në çdo nivel përgjegjësie”, tha Koçiu.
Ajo theksoi se ndërtuesit duhet të jenë të parët që tregojnë kujdes të shtuar:
“Shfrytëzimi i çdo metri katror më shumë se sa lejohet do të penalizohet rëndë – me gjobë, procedim penal dhe prishje të menjëhershme.”
Ministrja apeloi edhe tek qytetarët që blejnë pasuri të paluajtshme, duke u kërkuar të verifikojnë me kujdes dokumentacionin dhe statusin ligjor të çdo objekti, për të shmangur mashtrimet dhe abuzimet.
Sipas saj, masat po zbatohen mbi bazën e paketës së re ligjore të miratuar në fillim të tetorit, e cila ka forcuar mekanizmat e kontrollit të territorit dhe sanksionet për çdo shkelje. “Mbrojtja e territorit nuk ka kthim pas”, përfundoi Koçiu.