Një ngjarje e rëndë është shënuar të shtunën, më 14 shkurt, rreth orës 13:00, në një supermarket në Bergamo, ku një burrë tentoi të rrëmbente një vajzë vetëm një vjeç e gjysmë.
Sipas raportimeve, familja – nëna, babai dhe vogëlushja – po largoheshin nga ambientet e supermarketit kur një 37-vjeçar rumun, i pastrehë dhe pa precedentë penalë, e ka kapur papritur fëmijën nga këmbët, duke tentuar ta marrë me forcë.
Reagimi i menjëhershëm i prindërve dhe ndërhyrja e punonjësve të supermarketit shmangën më të keqen. Babai arriti ta ndalojë agresorin, ndërsa nëna mbante vajzën në krahë. Forcat e rendit mbërritën në vendngjarje dhe arrestuan 37-vjeçarin.
Pamjet e kamerave të sigurisë ndihmuan autoritetet të rindërtojnë dinamikën e ngjarjes. Burri akuzohet për tentativë rrëmbimi të një të mituri dhe për sulm të rënduar. Si pasojë e përleshjes, vogëlushja pësoi frakturë në femur, e konfirmuar nga ekzaminimet mjekësore në spital.
Dëshmitarët tregojnë se britmat e nënës alarmuan qytetarët përreth. Një grua rreth të 50-ave deklaroi se, pasi dëgjoi thirrjet për ndihmë, u përpoq ta ndalonte autorin duke e kapur nga xhaketa derisa mbërriti policia.
Ngjarja ka tronditur komunitetin lokal, ndërsa hetimet vijojnë për zbardhjen e plotë të rrethanave.