Gjykata e Shkallës së Parë të Juridiksionit të Përgjithshëm Tiranë ka caktuar masat e sigurimit personal “Arrest në burg” për 16 shtetas dhe ka vendosur 3 vendime për kontrolle banesash për 3 shtetas të tjerë. Ndër këta, 12 persona janë arrestuar dhe 4 të tjerë po ndiqen me masa kërkimi.
Sektori për Hetimin e Narkotikëve në DVP Tiranë, në bashkëpunim me autoritetet policore të Krujës dhe Tiranës, ka angazhuar forca të mëdha për dokumentimin e aktiviteteve kriminale të këtyre individëve, të cilët dyshohet se kanë operuar në bashkëpunim për kultivimin e kanabisit në zona të ndryshme të malësisë së Krujës gjatë periudhës 2021-2022.
Në mesin e personave të arrestuar janë E. A., 57 vjeç, A. A., 26 vjeç, I. V., 52 vjeç, Y. C., 48 vjeç, E. Sh., 26 vjeç, F. Z., 41 vjeç, I. D., 43 vjeç, R. D., 39 vjeç, L. A., 53 vjeç, D. K., 25 vjeç, I. H., 52 vjeç, dhe F. M., 52 vjeç, të cilët jetojnë në zonat e Kamzës dhe Krujës.
Materialet i kaluan Prokurorisë për veprime të mëtejshme hetimore.