Një ngjarje e rëndë ka tronditur fshatin Piskupat të Pogradecit më 30 dhjetor, pas zbulimit të abuzimit seksual ndaj një vajze 12-vjeçare. I dyshuari për këtë krim është 67-vjeçari Rushan Selko, i cili aktualisht ndodhet në paraburgim.
E mitura u dërgua për kontroll mjekësor nga prindërit, pasi kishin vënë re ndryshime fizike. Nga ekzaminimet rezultoi se ajo ishte shtatzënë rreth 22 javë.
Në një intervistë për emisionin “Shqipëria Live”, gjyshi i vajzës ka kërkuar që drejtësia të veprojë pa vonesë dhe ligji të zbatohet plotësisht ndaj autorit të dyshuar.
“Është një dhimbje që nuk ia uroj askujt. Asnjëherë nuk na shkonte mendja se mund të ndodhte diçka e tillë. Kërkojmë nga shteti të marrë masat dhe të zbatojë ligjin. Nëse jo, ky konflikt do na ndjekë gjithë jetën. Ose shteti, ose unë, sa të jem gjallë,” u shpreh ai. “S’ka bërë vaki një 70-vjeçar me një 12-vjeçare, fëmijë, ta lidhë me litar, t’i zërë gojën. Atë as në burg s’duhet”, tha gjyshi.
“Nuk shkon as mbesa e vogël në shkollë, nuk do të ndahet prej saj. Do më ngelet fëmija pa shkollë. Shtetit i lutem të vërë dorë, t’i sistemojë. Unë një djalë kam, por ai ka familjen e tij. Shteti po të ketë mundësi, se ata nuk vijnë më këtu”, deklaroi gjyshi.
Gazetarja Pamela Dervishi bëri me dije se dy familjet kishin marrëdhënie të afërta dhe komunikim të vazhdueshëm. Sipas saj, i dyshuari dhe bashkëshortja e tij e angazhonin shpesh të miturën për punë ndihmëse.