Koalicioni opozitar PD-ASHM i është drejtuar zyrtarisht Komisionit Qendror të Zgjedhjeve (KQZ), duke kërkuar moscertifikimin e rezultateve të zgjedhjeve të 11 majit dhe auditim të plotë të procesit të votimit nga diaspora.
Në letrën zyrtare, opozita kërkon që auditimi të kryhet nga ekspertë të pavarur, pa lidhje me institucione shtetërore apo subjekte politike, me qëllim garantimin e transparencës dhe besueshmërisë së procesit.
Sipas koalicionit PD-ASHM, është jetike ndërmarrja e hapave urgjentë nga ana e KQZ-së, veçanërisht në shtete me numër të lartë emigrantësh votues, si Greqia.
Letra mban firmën e Franc Nurit, përfaqësues zyrtar i koalicionit pranë KQZ-së.
Në zgjedhjet parlamentare të mbajtura më 11 maj, Partia Socialiste siguroi 83 mandate, ndërsa koalicioni PD-ASHM doli forcë e dytë me 50 mandate.
Partia Socialdemokrate e Tom Doshit mori 3 mandate, Mundësia e Agron Shehajt 2 mandate, ndërsa koalicioni Nisma Shqipëria Bëhet dhe Lëvizja Bashkë fituan nga 1 mandat secila.