Një operacion i gjerë antidrogë është duke u zhvilluar në Athinë, ku autoritetet greke kanë çmontuar një rrjet të organizuar të trafikut të narkotikëve që vepronte brenda dhe përreth Kampusit Universitar të Zografou.
Sipas mediave greke, në qendër të operacionit ka qenë një organizatë kriminale greko-shqiptare, e cila dyshohet se shpërndante lëndë narkotike në ambientet universitare. Deri në këto momente janë arrestuar katër persona, mes tyre dy shtetas shqiptarë dhe dy grekë.
Operacioni po kryhet nga Nëndrejtoria e Hetimit dhe Ndjekjes Penale të Krimit në Athinë (D.D.EEA/G.A.D.A.) dhe ka nisur që në orët e para të mëngjesit të së premtes.
Autoritetet bëjnë me dije se të arrestuarit banonin në konviktet studentore të universitetit, ndërsa gjatë kontrolleve janë sekuestruar sasi të konsiderueshme kanabisi si dhe shuma parash që kapërcejnë vlerën e 20 mijë eurove.
Hetimet paraprake tregojnë se aktiviteti i paligjshëm zhvillohej kryesisht në zonën përreth Kampusit Universitar të Zografou. Aksioni policor vijon ende dhe pritet që në orët në vijim të ketë informacione të reja lidhur me arrestime apo sekuestrime të tjera.