Një operacion i koordinuar i policisë spanjolle në Madrid, Lanzarote dhe Gran Canaria ka çuar në arrestimin e 11 personave, të dyshuar për përfshirje në një rrjet ndërkombëtar trafiku fëmijësh.
Sipas njoftimit zyrtar të policisë, katër prej tyre janë lënë në paraburgim dhe po përballen me akuza për krim të organizuar, falsifikim dokumentesh dhe pornografi fëmijësh.
Hetimet nisën pas zhdukjes së 14 të miturve nga strukturat shtetërore në Ishujt Kanarie, midis dimrit të vitit 2024 dhe pranverës 2025.
Autoritetet zbuluan se rrjeti përdorte rrugë dhe kontakte në Marok, Bregun e Fildishtë dhe Spanjë për të transportuar fëmijët dhe për t’u siguruar atyre dokumente të falsifikuara, me qëllim transferimin e tyre në Francë.
Gjatë kontrollit të dy banesave në Lanzarote, policia sekuestroi dokumente personale, pajisje elektronike dhe para në cash.
Hetimet vijojnë për të identifikuar viktima të tjera dhe lidhje të reja të mundshme me këtë rrjet kriminal, theksoi policia spanjolle.