TIRANË – Në GJKKO vijon seanca për dosjen “Plumbi i Artë” ku i penduari i drejtësisë Nuredin Dumani po dëshmon për krimet që ai ka kryer.
Dumani është pyetur në lidhje me atentatin e Elton Kilës i njohur ndryshe si “Oti” i Elbasanit, teksa është shprehur se atenati dështoi pasi ky i fundit nuk ndodhej në qytet.
Ai ka deklaruar se ka shkuar ditën që ishte planifikuar atentati në Elbasan bashkë me Henrik Hoxhën të vrisnin Oti Kilën. Kanë shkuar me dy makina, por Kila nuk ishte fare në Elbasan. Teksa është pyetur nga avokati pse ia atribuon tentativën e vrasjes Suel Çelës Dumani tregon se ky i fundit sipas tij e ka nxjerrë në pritë.
Dumani thotë se Henriku komunikonte vazhdimisht me Suel Çelën, ndërsa vetë Dumani vetëm pas atentatit i shkruante. I pyetur më tej se përse u prishën mardhëniet me Talo Çelën Dumani thotë se ky i fundit kishte urdhëruar ti vrisnin të vëllain.
Pjesë nga biseda në seancën gjyqësore
Avokati Përparim Kulluri: Si jeni arrestuar?
Nuredin Dumani: Isha i plagosur.
Avokati Përparim Kulluri: Keni thënë se do vrisnit Otin? Pse nuk e vratë?
Nuredin Dumani: Sepse nuk ishte në Elbasan.
Avokati Përparim Kulluri: Pse i thatë Suel Çelës “më vranë” dhe pastaj “më vratë”?
Nuredin Dumani: Sepse vetëm ai e dinte që unë isha aty.
Avokati Përparim Kulluri: Pse i jeni drejtuar Suel Çelës me fjalën “më vratë” në SKY. Pse ia atribuon tentativën e vrasjes Suel Çelës?
Nuredin Dumani: Mua më ka nxjerrë në pritë Sueli. Unë kam shkuar atë ditë në Elbasan bashkë me Henrik Hoxhën të vrisnim Ot Kilën. Shkuam me dy makina, por ai nuk ishte fare në Elbasan. Henriku komunikonte vazhdimisht me Suel Çelën. Unë vetëm pas atentatit i shkruaja. Më pas nuk kam komunikuar më, edhe pse ai ka kërkuar. Do zbardhet Matriksi e do dalin.
Avokati Përparim Kulluri: Pse e bëre marrëveshjen me prokurorinë?
Nuredin Dumani: Se atëherë m’u hapën sytë.
Avokati Përparim Kulluri: Çfarë ju ka premtuar prokuroria për marrëveshjen e bashkëpunimit?
Nuredin Dumani: Asnjë gjë.
Avokati Përparim Kulluri: Kur e njohe Talo Çelën?
Nuredin Dumani: Fundi i 2009, fillim 2010. Jam njohur nga Ilirjan Feçi.
Avokati Përparim Kulluri: Pse u prishën marrëdhëniet me Talo Çelën?
Nuredin Dumani: Ai ka urdhëruar Altin Ndocin të vrasë vëllain tim.
Avokati Përparim Kulluri: A ka ndenjur makina që u përdor në vrasjen e Andi Zylyfit në garazhin tënd?
Nuredin Dumani: Po. Ka qenë një makinë që e kishte vjedhur më parë Altin Ndoci.
Avokati Përparim Kulluri: A është përdorur në ngjarje tjetër?
Nuredin Dumani: Po për një ngjarje tjetër në Spitallë. Porositës ishte Baca, Gim Kabashi.
Avokati Përparim Kulluri: Keni pretenduar se Fatos Gosa ka qenë informator tek vrasja e Andi Zylyfit?
Nuredin Dumani: Po ka qenë. E kam paguar.
Avokati Përparim Kulluri: Si ka informuar Gosa?
Nuredin Dumani: Me telefon të enkriptuar. Fliste Talo Çela me të./Radar.al