SHKODËR– Gjykata e Shkodrës ka vendosur masën e sigurisë “arrest me burg” për Julian Cumrakun dhe Erzen Ukën, të ndaluar mbrëmjen e së hënës në zonën e Fushë-Arrëzit. Avokati mbrojtës i Ukës ka deklaruar se ndalimi i klientit të tij është i pabazuar, duke argumentuar se ai gjendej rastësisht në banesën ku u gjetën armët, të cilat pretendohet se nuk ishin në dijeninë e tij.
Avokati i Ukës thotë se mbi klientin e tij rëndon akuzë për terrorizëm, por vetëm për armëmbajtje pa leje, dhe se situata e përplasjes me policinë është pasojë e frikës së dy të rinjve se mund të rrezikoheshin gjatë ndërhyrjes.
“Ndaj klientit tim nuk ka akuzë për terrorizëm. Është ndalim i paligjshem. Ata akuzohen vetëm për armëmbajtje pa leje. Klienti im ndodhej rastësisht në shtëpinë e Cumrakut pasi janë shokë. Nuk dinte gjë për armët. Policia e shtetit i ka qëlluar. Duhet të japin llogari policia si u plagos. Nuk u dorëzuan sepse do t’i vrisnin”, u shpreh ai.
Dy të dyshuarit u kapën dy ditë më parë pas një operacioni të ndërlikuar të Policisë së Shtetit dhe forcave RENEA. Ata u gjetën të fshehur në një banesë në fshatin Orosh të Fushë-Arrëzit, ku dyshohet të kenë qëndruar për rreth dy muaj. Pas 12 orësh negociata dhe thirrjesh nga familjarët, të dy u dorëzuan pa bërë rezistencë.
Gjatë kontrollit në banesën ku fshiheshin, policia zbuloi një arsenal të madh armësh, që përfshinte katër automatikë, një pistoletë, 18 granata, shtatë karikatorë të mbushur me fishekë si edhe afërsisht 2 mijë municione të ndryshme.
Ngjarja nisi pasi patrullat e policisë konstatuan një person të dyshimtë që, sapo pa efektivët, u fut me shpejtësi në një banesë të braktisur dhe refuzoi të dorëzohej, duke i kërcënuar. Situata e rrezikshme solli ndërhyrjen e menjëhershme të forcave të specializuara RENEA, të cilat finalizuan arrestimin./Radar.al
Gjykata lë në burg Erzen Ukën dhe Julian Cumrakun, dyshohen për terrorizëm
Ekspertja imobiliare Eriola Canga: Philipp Plein dhe Mohamed Alabbar do rrisin çmimin e pronës