NASA ka konfirmuar planet për ndërtimin e një reaktori bërthamor në sipërfaqen e Hënës, projekt që synohet të realizohet brenda vitit 2030. Kjo iniciativë është pjesë e përpjekjeve për të ndërtuar një bazë të përhershme njerëzore në Hënë dhe për të siguruar energji të qëndrueshme për misionet e ardhshme hapësinore.
Sipas raportimeve të mediave amerikane, drejtues të NASA-s janë shprehur se planet vijnë si reagim ndaj garës hapësinore me Kinën dhe Rusinë, të cilat mund të përpiqen të vendosin “zona ndalimi” në Hënë.
Megjithatë, analistët dhe shkencëtarët kanë ngritur pikëpyetje mbi realizueshmërinë e projektit për shkak të shkurtimeve të buxhetit të NASA-s dhe dinamikave gjeopolitike që e shoqërojnë.
Ideja për një reaktor bërthamor në Hënë nuk është e re. Në vitin 2022, NASA shpërndau tri kontrata nga 5 milionë dollarë për të zhvilluar dizajne të reaktorëve. Ndërkohë, Kina dhe Rusia kanë njoftuar se synojnë të ndërtojnë një central bërthamor të automatizuar në Hënë deri më 2035.
Shkencëtarët janë të një mendjeje se energjia bërthamore është mënyra më e sigurt dhe më e qëndrueshme për të furnizuar me energji kolonitë e ardhshme në Hënë.