Partia Demokratike vijon të përçahet pas zgjedhjes së Endri Shabanit në postin e Avokatit të Popullit, një proces që u realizua me firmat e deputetëve demokratë dhe votat e socialistëve. Pas votimit në Kuvend, zhvillimet kulmuan me akuza të forta brenda selisë blu.
Në një mbledhje urgjente të kryesisë së PD-së, Sekretari i Përgjithshëm Flamur Noka hodhi tezën se lobimi për Endri Shabanin ishte bërë nga ish-deputetja Grida Duma. Sipas Nokës, disa deputetë kanë deklaruar se janë kontaktuar për këtë çështje, ndërsa ai shtoi se “ka gojëdhëna” që Duma ka qenë negociatore edhe me kryeministrin Edi Rama.
Por reagimi i Grida Dumës nuk vonoi. Ajo i quajti deklaratat e Nokës një përpjekje për ta përfshirë artificialisht në një betejë politike që nuk i përket.
“Që dikush të ketë dëshirë të më thërrasë në një betejë për të qenë interesant, edhe mund ta kuptoj. Por kjo nuk është loja ime. Këtë gjë e dinë mirë ata që e njohin politikën”, deklaroi Duma, duke ironizuar atë që e quajti “pseudo-strategji” të drejtuesve të PD-së.
Ajo minimizoi edhe peshën politike të postit të Avokatit të Popullit, duke e cilësuar atë si një “gol politik” pa pushtet real, të përdorur për të mbuluar probleme të tjera.
“Avokati i Popullit nuk ka pushtet real. Është një lojë politike për të fshehur gjëra të tjera. Faleminderit që ma japin, por ua kthej mbrapsht”, u shpreh ajo.
Duma iu përgjigj ashpër edhe kritikave se nuk po bën “opozitën e opozitës”, duke akuzuar drejtuesit aktualë të PD-së se janë njerëz që kanë mbi dy dekada në pushtet dhe nuk dinë ta lëshojnë atë.
“Kush është opozitë nga ju? Ju keni mbi 20 vjet në pushtet, nga i pari te i fundit. Po të dinit të lëshonit pushtet, nuk do kishit bërë ato që i keni bërë me një anëtarësi të shkretë”, tha Duma, duke shtuar se PD ndodhet në një skandal të rëndë që prej një muaji dhe po përpiqet ta shmangë përgjegjësinë.
Në përfundim, ajo theksoi se nuk ka asnjë arsye të përfshihet në akuza që, sipas saj, synojnë të godasin figura me peshë publike për të larguar vëmendjen nga problemet reale të Partisë Demokratike.