Tragjedi në një plazh në Montalto di Castro, Itali, ku 17-vjeçari Riccardo Boni humbi jetën pasi u varros nga rëra, ndërsa po luante me vëllezërit e tij. Babai i të ndjerit mohon zërat se flinte në momentin e ngjarjes:
“Isha dy-tre metra larg, i shikoja. Po gërmonin një gropë për lojë. Riccardo ishte më i gjatë se gropa, me kokë i dilte jashtë. Ndoshta nga lodhja apo nxehtësia… u rrëzua dhe nuk bërtiti. Pse nuk e dëgjova?”
Sipas dëshmive të para, pas largimit të vëllezërve, Riccardo kishte vazhduar të gërmonte për të ndërtuar një tunel në rërë. Por ajo u shemb mbi të, duke e mbuluar plotësisht teksa ai ishte i shtrirë dhe i pafuqishëm për të dalë. Gropa u mbyll si një “sarkofag natyral”, duke mos i dhënë kohë as për të kërkuar ndihmë.
Trupi i pajetë u gjet pas 40 minutash kërkime, falë vëllait të vogël 5-vjeçar që këmbëngulte: “Riccardo është nën rërë.” Ai drejtoi ekipin e shpëtimit drejt vendit ku kishte ndodhur tragjedia.
Ndërkohë, miqtë e Riccardo-s shprehen të shokuar:
“Ishte një djalë pozitiv, plot jetë. Nuk mund ta pranojmë këtë vdekje absurde. Po organizojmë një aktivitet për ta kujtuar. Ai nuk do të harrohet kurrë.”
Prokuroria e Civitavecchias ka hapur një hetim për ngjarjen tragjike.