Sekretari i Përgjithshëm i Partisë Demokratike, Flamur Noka, ka reaguar duke pretenduar se përjashtimi i dy këshilltarëve të PD në Bashkinë e Durrësit nuk është një vendim i imponuar, por një kërkesë e ardhur nga strukturat lokale të partisë.
Sipas Nokës, dega e PD në Durrës kishte depozituar më herët kërkesën për largimin e tyre, mbi bazën e pretendimeve të ngritura brenda organizatës. Ai thekson se vendimi është marrë mbi “fakte konkrete” të përcjella nga terreni.
Noka ka akuzuar një prej këshilltarëve se ka punuar në favor të Partisë Socialiste gjatë zgjedhjeve të 11 majit 2025, ndërsa këshilltari tjetër, sipas tij, ka shfrytëzuar funksionin për përfitime personale dhe ka bashkëpunuar me PS. Në këtë kuadër, ai i cilëson veprimet e tyre si të papranueshme për përfaqësimin e PD.
Ai shton se çdo interpretim tjetër mbi këtë vendim është i pavërtetë dhe e konsideron si dezinformim.