Reshjet e shiut të shoqëruara me ngrica kanë krijuar vështirësi të konsiderueshme në qarkullimin e automjeteve në Rrugën e Kombit. Si pasojë e kushteve të pafavorshme atmosferike, janë regjistruar tre aksidente rrugore, ku janë përfshirë rreth 15 automjete, mes tyre edhe një mikrobus dhe një autoambulancë e koncesionarit.
Nga aksidentet janë lënduar gjashtë persona, të cilët janë transportuar në spitalin e Rrëshenit për ndihmë mjekësore. Sipas burimeve zyrtare, të lënduarit ndodhen jashtë rrezikut për jetën.
Në vendngjarje kanë ndërhyrë shërbimet e Policisë Rrugore, si edhe punonjësit e kompanisë së mirëmbajtjes, të cilët po hedhin kripë në segmentet problematike të rrugës për të përmirësuar kushtet e qarkullimit dhe për të shmangur aksidente të tjera.
Autoritetet u bëjnë thirrje drejtuesve të mjeteve të tregojnë kujdes të shtuar gjatë lëvizjes, të respektojnë sinjalistikën rrugore dhe të përshtatin shpejtësinë me kushtet atmosferike.