Kanë dalë të tjera detaje nga vrasja e shqiptarit Nikolin Nika në Itali, mbrëmjen e 24 Nëntorit në Itali. 42-vjeçari me origjinë nga Shkodra ishte baba i dy fëmijëve.
Autori i dyshuar, i arrestuar është 62-vjeçari Albert Habipaj. Mediat raportojnë se ai ka mohuar që krimi kishte paramendim, duke i thënë hetuesve dhe Gjykatës së ishte vetëmbrojtje.
Sipas mjekëve, viktima ka tre goditje në pjesën e fytit, me një mjet të mprehtë, që dyshohet se është kaçavidë, por që nuk u gjet nga policia.
Habipaj u arrestua me akuzën e vrasjes me dashje, kurse sherri ndodhi në ambientet e një lokali të zonës dhe më pas u zhvendos në rrugë.
Mëngjesin e sotëm ai doli në Gjykatë për masë sigurie, ku iu përgjigj edhe pyetjeve, para gjyqtares së hetimeve paraprake Françeska Gigli. Ndaj 62-vjeçarit u dha masa “arrest me burg”, kurse motivet mbeten të paqarta.
I dyshuari, i ndihmuar nga avokatja Nicoletta Cozzi e Gjykatës së Piacenza-s, shpjegoi se “është mbrojtur nga një tentativë sulmi nga viktima, në kulmin e një mosmarrëveshjeje për arsye personale dhe mosmarrëveshje mes tyre”, por pa dhënë detaje, shkruan media italiane.
62-vjeçari ka përsëritur se nuk e kishte kuptuar seriozitetin e gjendjes së bashkëkombasit të tij në terren dhe ishte larguar. Viktima, sipas rezultateve të para të ekzaminimit të autopsisë, ka marrë tre goditje në qafë dhe ka ndërruar jetë thuajse menjëherë nga gjakderdhja.
Arma e krimit mbetet ende e paqartë, pasi hetuesit thonë se mund të jetë edhe thikë apo një çelës dhe ende nuk është gjetur.
Mbrojtja kërkoi masë më të zbutur sigurie, kurse Habipaj u izolua në Burgun Novato, në pritje të hetimeve të tjera, teksa mbeten për t’u zbardhur motivet.