Kolegji i Posaçëm i Apelimit ka vendosur sot ndryshimin e vendimit të Komisionit të Pavarur të Kualifikimit (KPK), duke konfirmuar në detyrë gjyqtarin e Gjykatës së Tiranës, Altin Abdiu. Në seancën e zhvilluar, trupi gjykues me anëtarët Ina Rama, Sokol Çomo, Albana Shtylla, Natasha Mulaj dhe Rezarta Schuetz shqyrtoi ankimimin e Abdiut kundër vendimit të 28 qershorit 2022, kur KPK kishte vendosur shkarkimin e tij.
Pas shqyrtimit në dhomë këshillimi, Kolegji vendosi në bazë të nenit 66, pika 1, germa “b” të ligjit, që të ndryshojë vendimin e KPK-së dhe të konfirmojë Altin Abdiun në detyrën e gjyqtarit.
Altin Abdiu ka një karrierë të gjatë në sistemin e drejtësisë, duke shërbyer që prej vitit 1995 si gjyqtar në Gjykatën e Rrethit Gjyqësor Tiranë.