Një ngjarje tragjike ndodhi më 12 qershor në Ahmedabad, Indi, kur një avion i kompanisë “Air India” u përplas me një ndërtesë banimi, duke shkaktuar një shpërthim të madh dhe një bilanc të rëndë prej 279 viktimash, përfshirë pasagjerë, ekuipazh dhe civilë në tokë.
Por mes zisë, janë edhe disa histori mbijetese që të lënë pa fjalë. Shtatë persona, për arsye nga më të ndryshmet, nuk hipën në avionin fatkeq – dhe kjo u shpëtoi jetën.
Njëri prej tyre është Yaman Vyas, një punonjës në Britani, i cili ndodhej për vizitë në shtëpi. Pasi nëna e tij e lutur që të qëndronte edhe disa ditë më shumë, ai vendosi të anulonte fluturimin – një vendim që rezultoi shpëtimtar.
Dy të rinj të tjerë, Jaimin dhe Priyia Patel, respektivisht 29 dhe 25 vjeç, mbërritën në aeroport, por nuk u lejuan të hipnin për shkak të një problemi në check-in. Të dëshpëruar, u kthyen në shtëpi, por më pas mësuan për fatkeqësinë që sapo kishin shmangur.
Edhe Savji Timbadia kishte planifikuar të udhëtonte, por një ndjesi e çuditshme e bëri të shtyjë fluturimin për javën tjetër. Vetëm pas lajmeve të aksidentit, ajo e kuptoi qartë arsyen e pasigurisë që kishte ndjerë.
Një tjetër rast është ai i Bhoomi Chaunan, i cili nuk arriti në kohë për shkak të trafikut dhe, kur mbërriti, u refuzua nga stafi në portë. Po ashtu, Jayesh Takkara e humbi fluturimin pasi një takim pune në Kalkutë zgjati më shumë se pritej.
Këta shtatë persona i shpëtuan një prej tragjedive më të rënda ajrore të viteve të fundit, falë fatit, ndjesive të brendshme apo thjesht rrethanave të papritura.