Trajneri i njohur italian, Carlo Ancelotti, është dënuar me një vit burg nga Gjykata e Madridit për evazion fiskal të kryer gjatë periudhës së drejtimit të Real Madridit në sezonin 2013–2014. Çështja ka të bëjë me mosdeklarimin e të ardhurave nga të drejtat e imazhit, që kapin vlerën e rreth 400 mijë eurove.
Megjithatë, për shkak të mungesës së precedentëve penalë dhe natyrës së veprës, Ancelotti nuk do të vuajë dënimin fizikisht, pasi sipas ligjit spanjoll, dënimet nën dy vjet për raste të tilla mund të pezullohen. Përveç kësaj, trajneri është gjobitur me 386 mijë euro dhe i është ndaluar për tre vjet përfitimi nga subvencione publike, lehtësira fiskale dhe të drejta sigurimesh.
Prokuroria spanjolle e kishte akuzuar fillimisht Ancelottin për një evazion më të madh, që arrinte në mbi 1 milion euro për vitet 2014 dhe 2015, por gjykata vendosi ta shpallë të pafajshëm për vitin 2015.
Në një deklaratë më të hershme, Ancelotti ka thënë se nuk ishte në dijeni për parregullsitë në kontratën e tij dhe se ishte përqendruar vetëm në marrjen e të ardhurave neto të parashikuara. Ai shtoi se praktika e menaxhimit të të drejtave të imazhit ishte shumë e përhapur në atë kohë, jo vetëm për lojtarët, por edhe për trajnerët.
Pavarësisht vendimit të gjykatës, Ancelotti vazhdon angazhimin e tij si trajner i kombëtares së Brazilit, një detyrë që e mori pas triumfit të fundit me Real Madridin në Ligën e Kampionëve.