Autoritetet britanike kanë goditur një bandë hajdutësh të përbërë nga pesë shtetas shqiptarë dhe një grua britanike, të përfshirë në dhjetëra vjedhje me vlerë të lartë në të gjithë Mbretërinë e Bashkuar. Të pandehurit kanë pranuar fajësinë për një seri grabitjesh që kapin vlerën mbi 1 milion paund.
Endrit Nikolli (27 vjeç), Kristian Gropcaj (30), Gjergj Lleshaj (31), Kristian Dedndreaj (28) dhe Sidorjan Lleshi (26) u deklaruan fajtorë për vjedhje gjatë seancave në Gjykatën e Kurorës në Chester, më 28 nëntor 2025 dhe 6 janar 2026. Ndërkohë, Jade Tubb (33 vjeçe), shtetase britanike dhe partnere e Nikollit, u shpall fajtore për konspiracion për posedim pasurie kriminale.
Sipas hetimeve, banda ka kryer të paktën 44 vjedhje në qarqe të ndryshme, përfshirë Cheshire, Staffordshire, Nottinghamshire, Warwickshire dhe West Mercia. Ata hynin në banesa duke përdorur shkallë për të hyrë nga dritaret ose ballkonet dhe grabisnin çanta firmato, bizhuteri, orë luksoze dhe shuma të mëdha parash.
Në Worcestershire, banda grabiti disa herë brenda një dite në zona si Feckenham, Barnt Green dhe Astwood Bank. Në West Mercia u regjistruan gjithashtu nëntë vepra penale në Hereford dhe Oswestry.
Gjatë bastisjeve, policia sekuestroi 13 çanta dore firmato dhe 14 orë luksoze me vlerë rreth 17 mijë paund, si edhe disa telefona celularë. Analiza e pajisjeve zbuloi qindra imazhe të sendeve të vjedhura dhe mesazhe që përmbanin lidhje me Google Maps, të cilat përputheshin me vendndodhjet e vjedhjeve.
Hetimet treguan gjithashtu se anëtarët e bandës takoheshin rregullisht në një kafene në lagjen e bizhuterive në Birmingham. Në komunikimet mes Nikollit dhe Tubbit, çifti e përshkruante veten si “Bonnie dhe Clyde”, duke iu referuar bashkëpunimit të tyre kriminal.
Policia konfirmon se shumica e sendeve të vjedhura janë shitur, ndërsa vetëm një pjesë e vogël është rikthyer te pronarët.
Pesë shtetasit shqiptarë mbeten në paraburgim dhe do të dënohen më 20 shkurt. Jade Tubb është liruar me kusht dhe do të njihet me vendimin e gjykatës në të njëjtën datë.