Një njoftim alarmi është publikuar nga sistemi RASFF i Komisionit Evropian dhe nga Agjencia e Ushqimit dhe Veterinarisë së Kosovës, ku bëhet me dije se produkti Caffe Monaco e prodhuar nga Devolli Corporation, ka rezultuar me prani të akrilamideve në Kroaci. Pavarësisht këtij njoftimi zyrtar, nga ana e AUVK nuk është sqaruar në mënyrë konkrete nëse janë marrë masa për tërheqjen e produktit nga tregu, nëse bëhet fjalë për të njëjtin lot të kafes apo nëse janë kryer analiza shtesë përmes marrjes së kampioneve në kompaninë prodhuese apo në rrjetet e marketeve ku ky produkt tregtohet.
Kjo situatë ngre shqetësime edhe për tregun shqiptar, duke shtuar nevojën për vëmendje të menjëhershme nga Autoriteti Kombëtar i Ushqimit, me qëllim marrjen e masave parandaluese në dobi të konsumatorëve dhe garantimin e sigurisë ushqimore. Akrilamidet janë përkufizuar që në vitin 1994 nga Agjencia Ndërkombëtare për Kërkime mbi Kancerin, pjesë e Organizatës Botërore të Shëndetësisë, si substanca potencialisht kancerogjene të klasës 2A. Studimet më të fundit tregojnë se ekspozimi i zgjatur dhe kronik ndaj akrilamideve mund të dëmtojë fibrat nervore dhe të rrisë rrezikun për sëmundje neurodegjenerative, përfshirë Alzheimerin.
Një meta-analizë e publikuar në vitin 2022 në revistën shkencore “Frontiers in Nutrition”, e cila përfshiu 31 studime dhe mbi një milion persona, konstatoi një lidhje mes konsumit mesatar prej rreth 23 mikrogramësh akrilamide në ditë për një periudhë afatgjatë prej rreth 15 vitesh dhe rritjes së rrezikut për disa lloje kanceri, përfshirë ato të zgavrës orale, stomakut, ezofagut, prostatës, pankreasit dhe tiroides. Sipas ekspertëve të sigurisë ushqimore, akrilamidet formohen kryesisht gjatë gatimit në temperatura të larta, veçanërisht në produkte me përmbajtje të lartë niseshteje, si patatet e skuqura, biskotat, pica dhe ushqime të tjera të përpunuara industrialisht, por edhe gjatë gatimit në kushte shtëpiake apo në furra me dru.
Organizata evropiane Safe Food Advocacy Europe ka ritheksuar nevojën për rritjen e ndërgjegjësimit të konsumatorëve mbi rreziqet që lidhen me këtë përbërës toksik, duke theksuar se transparenca, kontrolli i vazhdueshëm dhe reagimi i shpejtë institucional janë thelbësore për mbrojtjen e shëndetit publik.
