Kryeministri izraelit, Benjamin Netanyahu, ka dhënë urdhër që ushtria të kryejë sulme intensive ndaj Rripit të Gazës, pas akuzave për shkelje të armëpushimit nga ana e Hamasit. Lajmin e bëri të ditur vetë kabineti i tij në një deklaratë zyrtare, duke theksuar se urdhri erdhi pas konsultimeve të sigurisë me komandantët ushtarakë.
Izraeli ka akuzuar Hamasin se po inskenon kthimin e trupave dhe rivarrimin e mbetjeve njerëzore, ndërkohë që të dyja palët vazhdojnë të hedhin akuza të ndërsjella për shkelje të armëpushimit. Sipas Ministrisë së Punëve të Jashtme izraelite, aktivitetet e Hamasit “nuk janë vetëm keqdashëse, por edhe kërcënojnë stabilitetin e armëpushimit”, duke cituar pamjet e dronëve që tregojnë zhvendosje dhe rivarrim të mbetjeve trupore për të paraqitur një zbulim të rremë për Kryqin e Kuq.
Më herët gjatë ditës, Netanyahu njoftoi se mbetjet njerëzore që Hamasi dorëzoi gjatë natës i përkisnin një pengu, trupi i të cilit ishte gjetur më parë nga ushtria izraelite. Ai ka thirrur komandantët e ushtrisë për të diskutuar hapat e ardhshëm të Izraelit si përgjigje ndaj situatës, përpara se të urdhëronte sulmet.
Ky zhvillim vjen në kontekstin e konfliktit mes Izraelit dhe Hamasit, që ka nisur më 7 tetor 2023 pas një sulmi terrorist të militantëve palestinezë në Tel Aviv, duke shkaktuar tension të madh dhe përshkallëzim të dhunës në rajon.