Nesër, Tirana do të mirëpresë edicioni i nëntë i Maratonës, një nga ngjarjet më të mëdha sportive në Shqipëri, që mbledh mijëra vrapues nga e gjithë bota.
Kryeministri Edi Rama ka ndarë në rrjetet sociale një video nga edicionet e mëparshme, duke shprehur emocionet për këtë aktivitet që këtë vit përkon edhe me titullin e Tiranës si “Kryeqyteti Mesdhetar i Kulturës dhe Dialogut”.
Në edicionin e kaluar, mbi 4,000 pjesëmarrës nga Shqipëria dhe vendet e huaja si Polonia, Ukraina, Kosova e Austria, sfiduan veten në një garë emocionuese dhe të vështirë, duke dhënë maksimumin për të arritur linjën e finishit.
Për të garantuar mbarëvajtjen e ngjarjes, Policia e Tiranës ka marrë masa të rrepta. Nesër, nga ora 08:00 deri në 16:00, do të ketë kufizime të qarkullimit të automjeteve në një sërë segmentesh rrugore kryesore, duke përfshirë sheshin “Nënë Tereza”, bulevardin “Dëshmorët e Kombit”, rrugët “Ismail Qemali”, “Papa Gjon Pali II”, “George W. Bush”, “Lek Dukagjini” dhe disa bulevarde të tjera që preken nga itinerari i maratonës.
Gjithashtu, itinerari i mjeteve të transportit urban do të pezullohet përgjatë bulevardit “Dëshmorët e Kombit” dhe sheshit “Nënë Tereza”, ndërsa qarkullimi i automjeteve për transport të përzier, teknik dhe pasagjerësh (përveç transportit urban) do të ndalohet brenda Unazës së Madhe, për të siguruar një aktivitet të sigurt dhe pa pengesa.
Ngjarja pritet të sjellë një atmosferë festive dhe sportive, duke shndërruar kryeqytetin në një qendër ndërkombëtare të sportit dhe aktivitetit fizik.