TIRANË– Kryekomisioneri Ilirjan Celibashi teksa bëri publik rezultatin e zgjedhjeve të pjesshme për 5 Bashki të vendit, u ndal tek risia e këtyre zgjedhjeve, numërimi me inteligjencë artificiale i votave në bashkinë e Tepelenës.
Kreu i KQZ e vlerësoi përdorimin e Inteligjencës Artificiale si një test të suksesshëm, duke theksuar se leximi i fletë së votimit u bë pothuajse me saktesi te plote.
“Në Tepelenë testuam përdorimin e AI në numërimin dhe vlerësimin e votave. Kjo mënyrë e numërimit asesi nuk kishte për qëllim të zëvendësonte mënyrën manuale që përcakton Kodi Zgjedhor. Përdorimi i AI ishte test teknik, nëpërmjet të cilit ne si KQZ donim të shihnim sesa e dobishme mund të jetë në të ardhmen përdorimi i kësaj risie. Së paku përdorimin e AI në numërim e kemi parë si mjet të përshtatshëm për kontrollin e profesionalizmit dhe ndershmërisë të numëruesve dhe komisionarëve, testi i kryer dje ishte i suksesshëm, dhe përmbushi të gjitha pritshmëritë e KQZ. Leximi dhe numërimi fletëve u krye me sukses të plotë duke përdorur AI. U lexuan dhe analizuan në kohë reale nga programi përkatës kompjuterik. Në përgjithësi leximi dhe analiza e këtyre pamjeve prodhoi thuajse 100% të njëjtin rezultat me atë që ndoli nga numërimi fizik. Pamjet e faqes ballore të fletës, u lexuan me saktësi të plotë nëpërmjet sistemit të Inteligjencës Artificiale. U konstatuan vetëm disa pasaktësi në leximin e pjesës së pasme të fletës së votimit. Vlerësojmë që në të ardhmen arritja e saktësisë 100% do të varet nga ndërtimi i disa protokolleve teknike që do të duhet të respektohen nga numëruesit dhe komisionerët. Së pari, e qartë se duhet të bëhen ndryshime në Kodin Zgjedhor që rezultatet nëpërmjet teknologjie të konsiderohen ligjërisht zyrtare.”-deklaroi ai.
I pyetur nëse Inteligjenca Artificiale të aplikohet në zgjedhjet e ardhshme lokale në 2027, ai nuk e përjashtoi si mundësi.
“Inteligjenca Artificiale në rastin e zgjedhjeve mund të përdoret për shumë aspekte të procesit zgjedhor. Ne e pamë me dobi për ta përdorur për numërimin e fletëve të votimit. Në këtë rast përdorimi i AI nuk shmang komisionerët apo numëruesit, sepse do të duhet të jetë dikush që shfaq letrat para kamerës. Në kuptim të kohës, saktësisë apo edhe të elementëve të tjerë, për gjykimin tonë do të ishte e udhëz që të përdorej në të ardhmen. Gjithmonë nëse ne përdorim këtë mënyrë të numërimit dhe vlerësimit të fletëve të votimit. Nëse përdorim pajisjet elektronike këtë proces e kryen vetë pajisja. Për sa kohë AI po përdoret në shumë aspekte të jetës globale, nuk ka arsye pse në proceset zgjedhore të mos përdoret.“-tha Celibashi./Radar.al