Periudha e komunizmit në Shqipëri mbart histori të shumta individësh që u përballën dhe mbijetuan nën një regjim represiv, i cili synonte shkatërrimin e lirisë dhe dinjitetit njerëzor. Këto rrëfime nuk përfaqësojnë vetëm dhimbjen personale, por edhe qëndresën kolektive të një populli të tërë.
Analisti nga Kosova, Milaim Zeka, ka ndarë në emisionin “Top Story” përvojën e tij gjatë një vizite në Shqipërinë komuniste, duke theksuar se realiteti që pa ishte krejt ndryshe nga perceptimi që kishin shqiptarët e Kosovës për vendin amë.
Zeka tregoi se që në momentin e mbërritjes në aeroportin e Rinasit, u përball me një atmosferë frike dhe kontrolli. “Kur zbrita në Rinas, si djalë i ri, më priti Sigurimi i Shtetit dhe më vendosën syze dielli, duke më thënë se kishte shumë agjentë jugosllavë. Më sistemuan në hotel dhe aty kam takuar figura si Bujar Hoxha dhe Ajet Haxhiu, të cilët ishin përgjegjës për çështjen e Kosovës dhe shpesh përfundonin të dënuar si spiunë”, rrëfeu ai.
Sipas Zekës, gjatë 56 ditëve qëndrimi në Shqipëri, kushtet e jetesës ishin tejet të vështira. “Kam ngrënë vetëm bukë të zezë, djathë dhe domate. Nuk kam ngrënë ushqim të gatuar, sepse gatimi bëhej në banja. Kur u largova nga Shqipëria, nga Tirana deri në Vjenë kam udhëtuar duke qarë nga zhgënjimi”, u shpreh analisti.
Në përfundim, Zeka kritikoi ashpër mungesën e hapjes së dosjeve të komunizmit, duke deklaruar se përgjegjësia për krimet nuk bie vetëm mbi diktatorin. “Nëse Enver Hoxha ka kryer krime të mëdha, dhe këto janë të dokumentuara, një krim edhe më i madh është bërë nga ata që erdhën pas tij – djemtë dhe vajzat e regjimit – që nuk hapën dosjet,” tha ai.