Ndërsa Partia Demokratike vijon ta konsiderojë Edi Ramën “armik politik” pas zgjedhjeve të diskutueshme të 11 majit, kryebashkiaku demokrat i Kavajës, Fisnik Qosja, ka zgjedhur një qasje më pragmatike. I ftuar në Euronews Albania, ai deklaroi se ruan komunikim normal me kryeministrin, për çështje që lidhen me interesin e qytetit.
“Për çdo shqetësim zyrtar apo çështje për të mirën e qytetit, komunikoj me kryeministrin dhe në shumicën e rasteve ai ka reaguar pozitivisht”, tha Qosja, duke sqaruar se pavarësisht se është përfaqësues i PD-së, merr pjesë rregullisht në mbledhjet që Rama zhvillon me kryetarët e bashkive.
Deklaratat e tij vijnë në një kohë kur zyrtarisht PD-ja, e drejtuar nga Sali Berisha, ka përjashtuar çdo mundësi bashkëpunimi me Ramën, duke e shpallur publikisht “të padiskutueshëm në mosmarrëveshje”.
Megjithatë, Qosja duket se i jep përparësi bashkëpunimit institucional mbi përplasjet politike. Në lidhje me legalizimet, ai tha se nuk ka pse t’i tregojë Ramës planin e punës, por nuk e mohoi komunikimin e rregullt me të.
Batutat e shkëmbyera mes tij dhe Ramës në takimet me kryebashkiakët e vendit kanë tërhequr gjithashtu vëmendjen. Në një prej tyre, kur Qosja përmendi disa vendime legalizimi, Rama iu përgjigj me ironi:
“Je 0! Je demokrat komplet!”
Ndërsa Qosja replikoi: “Po, normalisht që demokrat jam.”
Kjo qasje e hapur e Qosjes e vendos atë në një linjë të kundërt me retorikën zyrtare të PD-së, duke ngjallur diskutime mbi rolin dhe lirinë vepruese të kryebashkiakëve demokratë në një realitet politik të polarizuar.