TAJLANDË- Vdekja e 6 personave në Tajlandë ka ngjallur dyshime në një kohë kur akoma nuk janë bërë të qarta shkaqet.
Por siç shkruajnë mediat e huaja, detaje të reja janë mësuar mbi vdekjen e 6 personave në një hotel luksos “Grand Hyatt Erawan” në Bangkok. Në gotat që kanë përdorur 6 viktimat janë gjetur gjurmë cianidi, ndërsa autoritetet vlerësojnë se helmimi është bërë nga njëri prej të vdekurve për shkak të borxheve që ai kishte.
Dy nga viktimat, 56-vjeçari Serin Chong dhe 55-vjeçari Dang Hung Van ishin amerikanë, ndërsa katër të tjerët ishin vietnamezë.
BBC shkruan se 2 prej 6 viktimave i kishin dhënë dhjetëra milionë baht (monedha tajlandeze/ 10 milionë baht janë rreth 280,000 dollarë) njërës prej viktimave të tjera për t’i investuar. Të afërmit e vietnamezëve dëshmuan se ata zotëronin një kompani ndërtimi dhe i kishin dhënë para Chong për të investuar në ndërtimin e një spitali në Japoni. Por mesa duket nuk i kishin marrë më paratë e tyre.
Ndërsa policia pasditen e të hënës, tha se të gjithë ishin mbledhur në një dhomë në katin e pestë të hotelit. Rreth orës 14:00, një punonjës hoteli shpërndau ushqimin dhe çajin që kishin porositur, të cilat i futi brenda në dhomë amerikani Chong.
Teksa është marrë në pyetje për më shumë detaje, kamarieri tha se 56-vjeçari ishte shumë i heshtur dhe i stresuar. Nga ora 14:03 deri në 14:17 të asaj pasdite, pesë persona të tjerë u futën në dhomë dhe nuk dolën më kurrë.
“Cianidi është një kimikat me veprim të shpejtë, potencialisht vdekjeprurës që ndërhyn në aftësinë e qelizave të trupit për të përdorur oksigjenin.”