Policia e Vlorës ka arrestuar tre persona dhe ka shpallur në kërkim një tjetër, në kuadër të një hetimi për ndërtime të paligjshme në zonat bregdetare të Jalës dhe Dhërmiut. Të arrestuarit janë shtetasit L. D. (41 vjeç), K. C. (40 vjeç) dhe I. Zh. (52 vjeç), të cilët mbanin funksione si inxhinierë zbatimi dhe drejtues teknik të projekteve ndërtimore. Sipas autoriteteve, ata lejuan kryerjen e punimeve ndërtimore pa lejet përkatëse ligjore.
Në kërkim është shpallur edhe shtetasi L. Gj., banues në fshatin Vuno, i dyshuar për të njëjtën vepër penale.
Përveç tyre, drejtori i Inspektoratit të Mbrojtjes së Territorit (IMT) në Bashkinë Himarë, E. V. (44 vjeç), si dhe tre inspektorë të këtij institucioni – M. K. (30 vjeç), A. J. (27 vjeç) dhe R. K. (30 vjeç) – janë marrë nën hetim për veprën penale të “Shpërdorimit të detyrës”. Ata dyshohen se nuk kanë ushtruar kontrollin e duhur për ndalimin e ndërtimeve të paligjshme në zonat turistike të mbrojtura.
Ndërhyrjet në këtë zonë janë pjesë e hetimeve të vazhdueshme për mbrojtjen e territorit dhe parandalimin e abuzimeve me lejet e ndërtimit, veçanërisht në zonat bregdetare me potencial të lartë turistik.