Komanda Ajrore e NATO-s ka konfirmuar se një dron u rrëzua nga avionë luftarakë të forcave aleate, të cilët vepronin nën komandën dhe kontrollin e Aleancës, pasi ai hyri në hapësirën ajrore të Rumanisë.
Më herët gjatë ditës, autoritetet rumune njoftuan se një avion luftarak F-16 kishte ndërhyrë për të neutralizuar dronin, duke e rrëzuar pasi ai kishte shkelur hapësirën ajrore të vendit.
Në një deklaratë zyrtare, NATO bëri të ditur se është hapur një hetim për të sqaruar rrethanat e incidentit. Aleanca theksoi se po bashkëpunon ngushtë me autoritetet rumune për të mbledhur të gjitha informacionet e nevojshme dhe për të përcaktuar natyrën e ngjarjes.
Deri më tani nuk janë bërë publike detaje mbi origjinën e dronit apo qëllimin e hyrjes së tij në hapësirën ajrore rumune. Autoritetet nuk kanë dhënë ende informacion nëse bëhet fjalë për një mjet ushtarak apo civil, ndërsa hetimet vijojnë.