Strukturat e Policisë së Shtetit janë vendosur në gatishmëri të shtuar në terren për shkak të përkeqësimit të kushteve atmosferike në vend.
Policia bën me dije se po vijojnë patrullimet dhe monitorimi i zonave urbane dhe rurale, me qëllim dhënien e ndihmës për përdoruesit e rrugës dhe qytetarët në rast nevoje, si dhe për parandalimin e paligjshmërive dhe rritjen e sigurisë rrugore.
Rreth 5500 punonjës policie janë angazhuar në të gjithë territorin, ndërsa 700 mjete të Policisë së Shtetit janë vënë në dispozicion për të mbështetur dhe ndihmuar qytetarët gjatë situatës së krijuar nga moti i keq.
Për shkak të reshjeve, erërave dhe fushëpamjes së kufizuar gjatë natës, Policia e Shtetit u bën thirrje drejtuesve të mjeteve të tregojnë kujdes të shtuar, të moderojnë shpejtësinë dhe të kontaktojnë numrin e emergjencës 112 në rast nevoje.