Rajoni i Ballkanit është përfshirë nga mot i ashpër, me temperatura të ulëta dhe reshje të dendura bore në disa zona.
Gjatë orëve të fundit, bora ka mbuluar Sarajevën dhe pjesën më të madhe të Bosnjë dhe Hercegovinës, ndërsa reshje intensive janë raportuar edhe në Kroaci, Serbi dhe vende të tjera të rajonit. Në Sarajevë trafiku është paralizuar për disa orë, me ekipet e pastrimit të rrugëve që punojnë pa ndërprerje për të normalizuar qarkullimin.
Edhe në pjesë të Bosnjës janë shënuar aksidente për shkak të kushteve të vështira atmosferike.
Në Kroaci, autoritetet kanë paralajmëruar shoferët të mos udhëtojnë pa kontrolle paraprake, pajisje dimërore dhe informacion për gjendjen e rrugëve, pasi bora ka krijuar probleme serioze në qarkullim.
Ndërkohë, në Maqedoninë e Veriut, Shqipëri dhe Kosovë janë regjistruar shira të rrëmbyeshëm, që në disa zona kanë shkaktuar vështirësi në qarkullim dhe rritje të rrezikut nga përmbytjet.