Ish-kryetarja e LSI-së dhe ish-bashkëshortja e Ilir Metës, Monika Kryemadhi, ka bërë një deklaratë të fortë në emisionin “LOG.” në News24, ku foli për pasojat personale të karrierës së saj politike dhe marrëdhëniet me ish-presidentin.
“E vetmja gjë që më vjen keq janë fëmijët e mi. Ata ngrihen në mëngjes dhe shkojnë të mbledhin vota për babain e tyre. Nuk më vjen keq për Ilir Metën,” tha Kryemadhi, duke shtuar se për hir të Shqipërisë, “shkatërroi familjen.”
E pyetur nëse ndien përgjegjësi për shqiptarët, Kryemadhi kujtoi se ajo ka qenë e para që denoncoi aferën e inceneratorëve. “Nëse Shqipëria pret shpëtimin nga një grua e divorcuar me tre fëmijë, atëherë ka marrë fund,” theksoi ajo me një ton të prerë.
Në vijim, ajo u shpreh kritike ndaj pasivitetit të qytetarëve, duke ironizuar: “Shqiptarët qeshin kur Rama u shan burrat çyrykë, në vend që të dalin të votojnë.”
Deklaratat e Kryemadhit kanë ngjallur reagime të shumta në rrjet, duke rikthyer vëmendjen te përplasjet brenda Partisë së Lirisë dhe te përfshirja personale e saj në jetën politike të vendit.