Ish-presidenti i Republikës dhe kreu i Partisë së Lirisë, Ilir Meta, ka dërguar në Gjykatën e Lartë rekursin kundër masës së sigurisë “arrest në burg”, të vendosur ndaj tij nga GJKKO me kërkesë të SPAK. Avokatët e tij kërkojnë zbutjen ose rrëzimin e vendimeve të dhëna më herët nga Shkalla e Parë dhe Apeli i Posaçëm.
Gjykata e Lartë ka regjistruar tashmë çështjen dhe pritet të caktojë datën e seancës si dhe trupën gjykuese që do të shqyrtojë ankimimin e Metës.
Ndërkohë, GJKKO ka përcaktuar 25 shtatorin, ora 11:00, si datë për seancën e parë paraprake ndaj Metës dhe katër të pandehurve të tjerë, nën drejtimin e gjyqtares Irena Gjoka. Ajo do të vendosë nëse çështja do të shkojë për gjykim, do t’i kthehet SPAK-ut për hetime shtesë apo do të pushohet.
SPAK i ka përfunduar hetimet më 28 korrik, duke bashkuar tre dosje të bujshme: aferën CEZ-DIA, lobimin e LSI-së në SHBA dhe hetimin pasuror. Ilir Meta dhe bashkëshortja e tij, Monika Kryemadhi, akuzohen për korrupsion pasiv, pastrim parash dhe mosdeklarim pasurie. Në dosje janë përfshirë edhe nëna e Kryemadhit, Fatime Kryemadhi, si dhe shtetasit Pirro Xhixho e Ema Çoku, të cilët akuzohen për pastrim parash dhe korrupsion.
Meta ndodhet në qeli prej tetorit 2024, ndërsa Kryemadhi është nën masën “detyrim paraqitje”. Apeli i GJKKO rrëzoi më 8 shtator kërkesën e Metës për lirim, duke lënë në fuqi vendimin e Shkallës së Parë, me argumentin se lirimi i tij do të rrezikonte manipulimin e provave dhe intimidimin e dëshmitarëve.