Kryetari i PL, Ilir Meta ka folur nga qelia duke thënë se në korridoret e burgjeve ka takuar njerëz me më shumë vlera dhe karakter se në “korridoret” e politikës.
Meta ka folur për “Opinion” duke iu përgjigjur disa pyetjeve me shkrim të dërguara nga gazetari Blendi Fevziu.
Këtë të fundit e ka befasuar përgjigja e pyetjes se çfarë ka mësuar në gjithë këto muaj izolim.
“Në korridoret e burgjeve kam takuar njerëz shumë më me vlera dhe karakter se në “korridoret” e politikës. Po kështu kam kuptuar dhe ndjerë atë që thoshte Musine Kokalari se lirinë duhet ta kërkojmë brenda vetes. Dhe unë fatmirësisht ndihem i lirë. Një mëngjes kur hyra te salla e pingpongut lexova në tabelë që ishte shkruar: I lir means Freedom. Falenderova edhe një herë nënën time që zgjodhi këtë emër për mua”, ka thënë Meta.