Pas marrjes së mandatit të deputetes nga Romina Kuko, Këshilli Bashkiak ka zgjedhur Megi Finon në krye të tij. Propozimi për emërimin e Finos erdhi nga Kryetari i Grupit të këshilltarëve socialistë, Eridian Salianji, ndërsa Endrit Braimllari u zgjodh në postin e nënkryetarit.
Megi Fino, e lindur në Janinë më 7 prill 1993, ka një profil të spikatur akademik dhe profesional. Ajo përfundoi programin ndërkombëtar parauniversitar IB në Pekin dhe më pas studimet në drejtësi në City, University of London, ku fitoi dy diploma master në të drejtën publike ndërkombëtare dhe praktikën ligjore. Në vitin 2015, u diplomua gjithashtu në gjuhën kineze nga SOAS University of London.
Gjatë karrierës së saj, Fino është angazhuar si juriste në çështje emigracioni dhe asistencë ligjore në qendra sociale, si dhe ka punuar si avokate dhe eksperte ligjore në kompani të njohura si CMS dhe Vodafone Albania. Në vitin 2021, ajo hartoi Indeksin e Integritetit për projektin STAR 3, pjesë e reformës së qeverisjes vendore, në bashkëpunim me UNDP.
Aktualisht, Megi Fino mban edhe postin e Zëvendësministres në Ministrinë për Evropën dhe Punët e Jashtme, detyrë që ushtron prej qershorit 2021. Ajo flet rrjedhshëm anglisht dhe spanjisht, dhe zotëron njohuri të thelluara në gjuhën kineze, italiane dhe greke.