Një nga operacionet më të mëdha kundër krimit të organizuar në Europë është zhvilluar nga Europol në bashkëpunim me autoritetet e pesë shteteve. Si rezultat, janë arrestuar 234 persona, shumica në Turqi, dhe janë sekuestruar mbi 21 ton drogë, përfshirë 3.3 milionë tableta ekstazi (MDMA), si dhe 300 milionë euro para cash.
Operacioni goditi katër rrjete të fuqishme kriminale që merreshin me trafik droge, pastrim parash dhe krime të dhunshme. Trafiku i kokainës bëhej nga Amerika e Jugut drejt Europës përmes detit dhe tokës, heroina vinte nga Irani dhe Afganistani, ndërsa kanabisi kalonte përmes Ballkanit.
Aksioni policor u zhvillua në Turqi, Belgjikë, Gjermani, Spanjë dhe Holandë. U konfiskuan gjithashtu 681 prona dhe 127 automjete.
Operacioni u mundësua falë analizimit të mesazheve të koduara të përgjuara nga platformat e komunikimit të hakeruara Sky ECC dhe ANOM. Informacioni u shpërnda nga autoritetet franceze dhe u shfrytëzua nga njësitë speciale të policisë belge dhe turke.
Zyrtari i Europol-it, Andy Kraag, e quajti këtë “një goditje çekiçi për krimin e organizuar”, duke theksuar se mes të arrestuarve janë edhe figura drejtuese të këtyre rrjeteve. Hetimet vazhdojnë dhe arrestime të tjera nuk përjashtohen.