Policia shqiptare ka arrestuar në Cakran të Fierit 24-vjeçarin Erbin Nazeraj, i dënuar në mungesë nga Gjykata e Xhenovës me 6 vite burg për përdhunim, grabitje dhe plagosje të një 75-vjeçareje italiane.
Sipas raportimeve të mediave italiane, ngjarja e rëndë ndodhi në verën e vitit 2021 në Xhenova, kur Erbin Nazeraj, një 24-vjeçar shqiptar, sulmoi seksualisht një grua 75-vjeçare.
Sipas dinamikës së përshkruar nga hetuesit italianë, i riu e kishte ndjekur viktimën që nga autobusi, duke nisur me ngacmime. Pasi ajo mbërriti në banesën e saj, ai e ndoqi dhe hyri me forcë brenda. Aty e goditi me grusht në fytyrë dhe më pas abuzoi seksualisht me të. Në largim, i vodhi edhe telefonin.
Gjykata e Apelit në Xhenova e dënoi në mungesë me 6 vite burg për dhunë seksuale, grabitje dhe plagosje personale. Pas ngjarjes, ai ishte zhdukur dhe ndaj tij u lëshua një urdhër-arresti europian.
Arrestimi i tij u bë i mundur së fundmi në Fier, falë një operacioni të përbashkët mes autoriteteve italiane dhe shqiptare, me mbështetjen e njësisë speciale FAST dhe Zyrës së Ekspertit të Sigurisë së Ambasadës Italiane në Tiranë.fqinj.