Shqipëria vijon të tërheqë vëmendjen e mediave ndërkombëtare si një nga destinacionet turistike më tërheqëse në Evropë, falë natyrës së paprekur, trashëgimisë kulturore dhe çmimeve konkurruese.
Revista italiane e udhëtimeve “The Wom Travel” e ka renditur Shqipërinë mes 10 destinacioneve më autentike dhe më pak të mbipopulluara nga turistët për verën e vitit 2026. Në këtë listë, vendi ynë renditet krah destinacioneve si Kroacia, Mali i Zi, Sllovenia, Portugalia, Holanda, Estonia, Lituania, Skocia dhe Bullgaria.
Sipas artikullit, Shqipëria është zgjedhja ideale për udhëtarët që dëshirojnë të shmangin destinacionet e mbushura me turistë dhe të përjetojnë një eksperiencë autentike, mes natyrës, kulturës dhe mikpritjes tradicionale.
Vëmendje të veçantë i kushtohet Rivierës Shqiptare, e cila po fiton gjithnjë e më shumë reputacion si një nga perlat e reja të Mesdheut. Me rreth 150 kilometra vijë bregdetare përgjatë detit Jon, ajo ofron plazhe me ujëra të kristalta, gjire të fshehura, peizazhe spektakolare dhe një atmosferë të qetë, larg turizmit masiv.
Revista thekson se, krahas bukurisë natyrore që shpesh krahasohet me bregdetin grek, Shqipëria mbetet një nga destinacionet më ekonomike në Evropë, me çmime dukshëm më të ulëta dhe një fluks turistësh më të moderuar.
Sipas “The Wom Travel”, Durrësi, Vlora dhe Saranda janë tre pikat kryesore për të zbuluar bregdetin shqiptar. Durrësi përshkruhet si një qytet energjik dhe i preferuar nga të rinjtë, ndërsa Vlora vlerësohet për gjirin e saj të mrekullueshëm dhe për plazhin e Gjipesë, i konsideruar ndër më të bukurit në Shqipëri falë natyrës së paprekur.
Saranda cilësohet si “Nimfa e Jonit” dhe zemra e Rivierës Shqiptare, duke ofruar një kombinim të pushimeve bregdetare me turizmin kulturor. Vetëm pak kilometra larg saj ndodhen plazhet e Ksamilit, të njohura për ishujt e vegjël dhe ujërat e kristalta që shpesh krahasohen me Karaibet, si dhe Parku Arkeologjik i Butrintit, pjesë e Trashëgimisë Botërore të UNESCO-s.
Artikulli rekomandon gjithashtu destinacione më pak të njohura, si plazhi i Krorezës, i arritshëm vetëm nga deti, dhe plazhi i Kakomesë, i rrethuar nga vegjetacioni tipik mesdhetar.
Në fund, revista ndalet edhe te fshati historik i Qeparoit, ku shtëpitë tradicionale prej guri po restaurohen dhe po shndërrohen në hotele butik, duke ruajtur identitetin autentik të zonës dhe duke e kthyer atë në një destinacion gjithnjë e më tërheqës për vizitorët vendas dhe të huaj.