Ish-deputeti i Partisë Demokratike, Dashnor Sula, ka reaguar pas përjashtimit të tij nga lista e kandidatëve për zgjedhjet e 11 majit, duke theksuar se nuk është ndjerë i vlerësuar nga partia që përfaqësoi për vite me radhë.
Në një deklaratë për mediat, Sula theksoi se PD humbi një mundësi reale për të maksimizuar rezultatin në këto zgjedhje, pasi sipas tij, duhej të kishte bërë një koalicion të gjerë me të gjithë faktorët opozitarë.
“PD duhej të kishte bërë koalicion me të gjitha partitë e opozitës në mënyrë që të maksimalizonte votën. Ky fragmentim i opozitës vetëm sa i dha më shumë avantazh kundërshtarit,” u shpreh ai.
Duke komentuar përjashtimin e tij nga lista, Sula nuk i fshehu zhgënjimin:
“Nuk mund të punoja sepse më thanë se isha i pavlerë dhe nuk na duhesh më. Nuk më konsideruan as në listë të mbyllur dhe as në atë të hapur. Si është ajo shprehja, ‘nuk marr as grua me zor dhe as burrë me zor’. Unë isha te dera, por ma mbyllën. Nuk hyhet dot me zor.”
Sipas tij, mungesa e respektit nga partia është ajo që e ka lënduar më shumë në këtë proces, duke lënë të kuptohet se vendimi për ta lënë jashtë nuk kishte bazë meritokracie.