Partia Demokratike dhe koalicioni “Aleanca për Shqipërinë Madhështore” prezantuan këtë të shtunë programin elektoral për zgjedhjet e 11 majit, gjatë një takimi në Pallatin e Kongreseve, ku u mblodh edhe Kuvendi Kombëtar i PD-së.
I pranishëm ishte edhe këshilltari amerikan i fushatës, Chris LaCivita, i cili u ul në krah të Sali Berishës dhe mbajti një fjalim të shkurtër, më pak se 2 minuta ku e krahasoi programin e PD-së me atë të presidentit Donald Trump dhe ish-presidentit Ronald Reagan, duke e cilësuar si një plan konservator për uljen e taksave dhe mbështetjen e familjeve shqiptare.
“Berisha është mik i vërtetë i familjeve shqiptare, ndryshe nga lidershipi i fshehtë dhe i dështuar i Ramës”, u shpreh LaCivita.
Takimi nisi me një batutë të Artiola Tabakut për simbolikën e fushatës me “bufin epik që ha minjtë e gjirizeve të Rilindjes”, ndërsa PD prezantoi edhe spotin e fushatës që sulmonte drejtpërdrejt kryeministrin Rama dhe lidhjet e tij me George Soros.
“Ne e dimë se 12-vjecari i Ramës ka qenë një zhgënjim i vërtetë. Një dështim i një udhëheqësi të qëndrueshëm kundër familjeve shqiptare. Por, ne kemi doktor Berishën, një mik të vërtetë të familjeve shqiptare. Ai ka një program të vërtetë për të ulur kostot e familjeve dhe një program konservator njësoj si ai i presidentit Regan dhe Trump. Është një plan i vërtetë për të ulur taksat. Një plan të vërtetë për të rinjtë shqiptarë dhe për të ardhmen. Ky është qëllimi i kësaj fushate. Është ky dallimi mes një udhëheqjeje të qëndrueshme të Berishës dhe të një udhëheqjeje në fshehje të asaj të PS-së. Një fitore për Berishën është një fitore për familjet shqiptare”, tha LaCivita.
