Nëse ju i keni akoma faturat e shpenzuara për mjekim, arsimim apo dhe interesat bankare të kredive që zotëroni, mund t’ju zbriten nga të ardhurat vjetore.
Nga këto zbritje mësohet se përfitojnë ata individë me të ardhura nga punësimi, qiratë apo edhe të dypunësuarit.
“Nuk është diçka e vështirë për t’u llogaritur është një analizë që lidhet me atë çfarë i ndodh familjes gjatë vitit ka që kanë nevoja për arsim ka edhe për shëndetësi. Në fakt duhet të ishte çik më e gjerë të përfshinte edhe ata që kanë nevoja për strehim dhe kategori të tjera në mënyrë që shpenzimet të kishin harmonizim me të ardhurat që realizon individi”, shprehet kontabalisti Eduart Gjokutaj.
Por për të kuptuar se si llogariten shpenzimet e zbritshme marrim rastin e një individi në kryeqytet me të ardhura totale bruto në vlerën e 1 milionë e 900 mijë lekëve të cilat vijnë kryesisht nga paga, interesat bankare por dhe qiratë.
Shpenzime e zbritura nga ato të përgjithshme që bën një individ i njihen kontributet për sigurimet shoqërore dhe shëndetësore në vlerën e 130 mijë lekëve, shpenzime për shkollim në vlerën e 80 mijë lekëve dhe shpenzime për mjekim në vlerën e 40 mijë lekëve.
Nga kjo përllogaritje ky individ në total 250 mijë lekë shpenzime të zbritshme.
“Natyrisht nga këto ardhura bruto zbriten shpenzimet dhe ajo çfarë ngelet kthehet në një objekt të taksimit me shkallët progresive përkatëse. Në rastin tonë shembull tatimi i llogaritur është 19 mijë e 500 lekë”, thotë Gjokutaj.
Ekspertët e tregut ngrenë shqetësimin se më shumë kategori të zbritshme duhet t’u njihen individëve.
“Shpenzimet atë qëllim kanë të përfitojnë por gama e shpenzimeve duhet riparë se nuk i bënë të interesuar për të deklaruar të ardhurat gjithsej”, shton Gjokutaj.
Nga ana tjetër drejtoria e Tatimeve bën me dije se me formatet e reja të deklaratave individuale të cilët kanë efekt një vit më pas, do të ketë përfitime të reja.
Alketa Çabej, DPT: “Veç kësaj zbritje do të jetë dhe zbritja për çdo fëmijë 48 mije lekë në vit. Por të dyja këto zbritje i kanë efektet për vitin 2025 dhe do kryhen në 2026”.