Megjithëse Albawings nuk ka bërë një njoftim zyrtar për mbylljen e aktivitetit, lajmi është konfirmuar nga burime të pavarura. Aktualisht, faqja zyrtare e kompanisë nuk ofron më mundësinë për të bërë rezervime.
Vitit të kaluar, Albawings zotëronte 5% të tregut të fluturimeve në Shqipëri, duke u renditur e treta pas Wizz Air dhe Air Albania. Gjatë muajve të parë të këtij viti, pjesa e saj e tregut ka rënë në mënyrë drastike.
Arsyet e mbylljes së Albawings nuk janë bërë publike, por kompania ka pasur vështirësi financiare në tre vitet e fundit. Nga viti 2020 deri në vitin 2022, Albawings ka regjistruar një humbje kumulative prej mbi 8 milionë euro. Në vitin 2020, kompania raportoi një humbje prej 2.36 milionë euro, e cila u thellua në 4.1 milionë euro në vitin 2021. Në vitin 2022, humbjet u zvogëluan në 1.4 milionë euro, por kompania vazhdoi të operojë me humbje.
Në bilancin e vitit 2022, drejtuesit e kompanisë kishin vlerësuar se Albawings kishte burime të mjaftueshme për të vazhduar aktivitetin në të ardhmen e afërt, por situata financiare u përkeqësua më tej. Së fundmi, kompania është përballur me dy sekuestro preventive mbi kuotat e saj, një nga debitorë privatë dhe një tjetër nga administrata tatimore për detyrime të papaguara.
Albawings filloi aktivitetin e saj në vitin 2015. Aksionerët e kompanisë janë Dritan Shakohoxha dhe Dhimitër Tola me nga 10% secili, Nertila Kole me 20%, dhe Travel Hub Solutions me 40% të aksioneve.