Një re toksike klori ka përfshirë disa zona të Katalonjës pas shpërthimit të një zjarri në një magazinë industriale që ruante produkte kimike për pishina. Zjarri, i cili shpërtheu herët në mëngjes në Vilanova i la Geltrú, një qytet mes Barcelonës dhe Tarragona, ka detyruar autoritetet të urdhërojnë më shumë se 160,000 banorë të qëndrojnë brenda shtëpive të tyre.
Mbrojtja Civile e Katalonjës ka paralajmëruar banorët të mbyllin dritaret dhe të shmangin çdo ekspozim në ajër të hapur për të evituar rrezikun. Zjarri është vënë nën kontroll, por reja toksike e klorit vijon të monitorohet për të përcaktuar nivelin e rrezikut.
Fatmirësisht, nuk ka raporte për të lënduar, ndërkohë që ekipet e emergjencës janë në terren duke ndihmuar në situatën e krijuar. Autoritetet kanë kërkuar nga qytetarët të respektojnë masat e sigurisë dhe të jenë të gatshëm për ndihmë të mëtejshme.