Të gjithë personat që hyjnë ose dalin nga Shqipëria duhet të deklarojnë pranë autoriteteve doganore çdo shumë parash, instrument financiar, metal apo gur të çmuar, send me vlerë ose objekt antik, nëse vlera totale e tyre kalon 10 mijë euro ose ekuivalentin në monedha të tjera.
Sipas Drejtorisë së Përgjithshme të Doganave, kjo masë synon rritjen e transparencës financiare dhe luftën kundër pastrimit të parave, kontrabandës dhe trafikut të paligjshëm të objekteve me vlerë.
Procedura e deklarimit kryhet në zyrat doganore të pikave kufitare, përpara se udhëtari të paraqitet për kontrollin e pasaportës. Plotësimi i formularit për raportimin e transportit të vlerave në kufi është pa pagesë, ndërsa udhëtarët duhet të disponojnë dokumentacion që vërteton burimin e shumave ose të sendeve të deklaruara.
Autoritetet paralajmërojnë se mosdeklarimi ose deklarimi i pasaktë shoqërohet me masa administrative dhe ligjore. Për shumat nga 10.000 deri në 19.999 euro, gjoba për shkeljen e parë është 20.000 lekë. Për vlera më të larta, penalitetet shtohen në mënyrë progresive, duke arritur deri në 50 për qind të shumës së padeklaruar për rastet mbi 50.000 euro.
Detyrimi për deklarim zbatohet për të gjithë udhëtarët, pavarësisht nëse kalojnë kufirin me avion, anije, automjet, motor, biçikletë apo në këmbë. Gjithashtu, nuk ka rëndësi nëse vlerat monetare janë në pronësi të udhëtarit apo të një personi tjetër; deklarimi kërkohet sa herë që tejkalohet kufiri i përcaktuar prej 10 mijë eurosh.