Një punonjës i Policisë së Sarandës është vendosur në masën e sigurisë “arrest në shtëpi”, pasi dyshohet se ka kryer punime ndërtimore pa leje në një pronë ku banon bashkë me familjen e tij.
Sipas Agjencisë së Mbikëqyrjes Policore (AMP), masa është ekzekutuar ndaj Ajdin Islamajt, i cili në kohën e kryerjes së veprës së dyshuar ushtronte detyrën e Specialistit për Hetimin e Krimeve në Komisariatin e Policisë Sarandë.
Hetimet e zhvilluara nën drejtimin e Prokurorisë së Sarandës kanë zbuluar se në një pasuri në pronësi të babait të tij janë kryer ndërhyrje ndërtimore pa lejen përkatëse, duke përfshirë shtimin e një kati mbi një objekt ekzistues dykatësh dhe punime të tjera me synim përshtatjen e godinës për aktivitet hotelerie.
Sipas aktit të ekspertimit teknik, struktura e ndërtuar konsiderohet ndërtim i ri dhe për realizimin e saj kërkohej leje ndërtimi nga autoritetet kompetente. Verifikimet kanë treguar se për këtë objekt nuk është miratuar asnjë leje.
AMP bën me dije se sipërfaqja e ndërtuar pa leje është jo më pak se 159 metra katrorë dhe se punimet dyshohet të jenë kryer gjatë vitit 2025. Kjo është konfirmuar edhe përmes analizës së pamjeve satelitore të administruara gjatë hetimit.
Agjencia e Mbikëqyrjes Policore thekson se respektimi i ligjit duhet të jetë standard për çdo punonjës të Policisë së Shtetit dhe se askush nuk mund të jetë mbi ligjin, pavarësisht funksionit që mban.
Hetimet vijojnë për të dokumentuar plotësisht përgjegjësitë penale dhe për të identifikuar çdo person të përfshirë në realizimin e ndërtimeve të dyshuara si të paligjshme.