Ministria e Arsimit ka njoftuar se do të rihapet edhe një herë portali për aplikimin me formularët A1 dhe A1Z për maturantët dhe kandidatët që synojnë të marrin pjesë në Maturën Shtetërore 2025. Sipas urdhrit të Qendrës së Shërbimeve Arsimore (QSHA), aplikimi do të jetë i mundur më 12 dhe 13 maj 2025, nga ora 08:00 deri në 16:00, përmes portalit e-Albania.
Formulari A1 plotësohet nga maturantët e këtij viti shkollor, ndërsa formulari A1Z nga të gjithë kandidatët që kanë përfunduar më parë gjimnazin dhe duan të aplikojnë sërish në maturë.
Plotësimi kryhet fillimisht online, por më pas duhet të konfirmohet në shkollën përkatëse nën mbikëqyrjen e një personi të caktuar nga drejtoria, që ka akses në sistem. Pas përfundimit, formulari printohet, nënshkruhet nga maturanti dhe mbikëqyrësi dhe vuloset nga drejtori i shkollës.
Aplikimi është kusht i domosdoshëm për t’u pranuar në provimet e maturës dhe për të vazhduar më tej me përzgjedhjen e degëve universitare.