Kandidatja e Partisë Socialiste për bashkinë e Tiranës, Ogerta Manastirliu, zhvilloi sot një takim me mësues e mësuese, ku prezantoi vizionin e saj për modernizimin e shkollave dhe forcimin e rolit të tyre në jetën e komunitetit.
“Shkolla është qendra më e rëndësishme e një komuniteti. Klasa është vendi ku formohen brezat e ardhshëm, ku dija përçohet dhe përthithet, ku ndërtojmë qytetarin e së nesërmes”, u shpreh Manastirliu.
Ajo theksoi se bashkia nën drejtimin e saj do të punojë për ta forcuar bashkëpunimin mes shkollës, familjes dhe bashkisë, duke e kthyer këtë lidhje në një “instrument proaktiv për zhvillimin e komunitetit”.
“Në shkollë është gjithë energjia – e fëmijëve, e mësuesve, e prindërve dhe e komunitetit. Kjo energji duhet rikthyer në dije për fëmijët dhe në kënaqësi për mësuesit”, – tha kandidatja socialiste.
Duke folur për prioritetet e saj për mandatin e ardhshëm, Manastirliu tha se çdo projekt bashkiak do të ketë një dimension social, për t’u siguruar që “çdo anëtar i komunitetit të ndihet i vlerësuar dhe i respektuar në rolin që ka”.