Ministri i Financave, Petrit Malaj, deklaroi se pensionet do të mbeten në fokus të politikave sociale edhe gjatë vitit 2026, duke njoftuar një paketë të re mbështetëse për pensionistët.
Sipas Malajt, duke nisur nga janari 2026, buxheti i shtetit do të akordojë 10,4 miliardë lekë për të kompensuar rritjen mujore të të ardhurave për pensionistët, në përputhje me kategoritë përkatëse të përfitimit.
Ministri sqaroi se pensionet urbane me vite të plota pune do të përfitojnë një rritje prej 1 800 lekësh në muaj, ndërsa pensionet urbane të pjesshme do të rriten me 800 lekë në muaj.
Pensionistët ruralë që kanë dalë në pension para 31 dhjetorit 2024 do të përfitojnë një rritje mujore prej 1 000 lekësh. Ndërkohë, pensionet familjare do të rriten me 700 lekë në muaj, ndërsa pensionet e invaliditetit të punës do të kenë një rritje prej 600 lekësh në muaj.
Sipas ministrit të Financave, kjo paketë synon përmirësimin e kushteve ekonomike të pensionistëve, rritjen e fuqisë blerëse dhe forcimin e mbrojtjes sociale, duke reflektuar angazhimin e qeverisë për mbështetjen e kësaj kategorie.