Prej të hënës, në Facebook po qarkullon një video e krijuar me ndihmën e aplikacioneve që përdorin Inteligjencën Artificiale, e cila keqpërdor imazhin e shefit të Urgjencës Kombëtare, Skënder Brataj, dhe të gazetarit Blendi Fevziu.
Në videon e manipuluar, Fevziu shfaqet duke raportuar mbi një sulm fizik ndaj Bratajt, që pretendohet se është kryer nga “mafia farmaceutike”, pasi ky i fundit kishte shpërndarë një video ku fliste për efektet pozitive të një kremi, i cili premton të shërojë një listë të gjatë sëmundjesh.
Sigurisht, asgjë nga ato që thuhet në këtë video nuk është e vërtetë.
I kontaktuar nga BIRN, doktor Brataj tha se ishte i shqetësuar, pasi materiale të tilla mashtruese qarkullojnë prej muajsh në rrjetet sociale.
“Është shqetësim sidomos për pacientë që vijnë deri në QKUM [Qendrën Kombëtare të Urgjencës Mjekësore] për të kërkuar trajtim,” tha Brataj, duke shtuar se “është një problem shumë i madh”.
Ai shtoi se çdo ditë iu përgjigjet qytetarëve të shqetësuar që i shkruajnë në rrjetet sociale dhe se i ka raportuar disa herë këto postime tek Facebook. Megjithatë, përpjekjet e tij nuk kanë ndalur shpërndarjen e videove, edhe pse ka vënë në lëvizje edhe sektorin kundër krimit kibernetik në Policinë e Shtetit.
“Është shumë shqetësuese, sepse njerëzit u besojnë këtyre videove,” shpjegoi Brataj.
“Më erdhi para disa ditësh, në mes të vapës, një burrë nga Lezha, mbi 70 vjeç. Djali nga Italia ia kishte shpjeguar që ishte mashtrim, por ai këmbëngulte ta dëgjonte edhe nga unë,” tregoi ai.
Sipas tij, ekspertët i kanë bërë me dije se publikuesit e këtyre videove nuk ndodhen në Shqipëri.
Edhe gazetari Blendi Fevziu, drejtues i emisionit “Opinion” në TV Klan, shprehu shqetësim për videon që po qarkullon në Facebook dhe e cilësoi rastin si “skandaloz”.
“Është manipulim i pastër dhe i rrezikshëm, sepse mund të ndikojë negativisht në shëndetin e qytetarëve,” tha ai.