Ditën e hënë, liderët e Britanisë së Madhe, Francës dhe Kanadasë paralajmëruan për masa të përbashkëta nëse Izraeli nuk ndalon ofensivën ushtarake dhe nuk lejon ndihmat humanitare.
Në nnjë deklaratë të përbashkët, kryeministri britanik Keir Starmer, presidenti francez Emmanuel Macron dhe kryeministri kanadez Mark Carney u shprehën: “Nuk do të qëndrojmë duarkryq ndërsa qeveria e Netanyahut ndjek këto veprime të rënda. Nëse Izraeli nuk ndalon ofensivën ushtarake dhe nuk heq kufizimet mbi ndihmën humanitare, ne do të ndërmarrim hapa konkretë në përgjigje.”
Gjithashtu ata kritikuan dhe deklaratat e ministrave izraelitë të cilët kërcënuan me zhvendosje masive të popullsisë palestineze.
Kryeministri izraelit Benjamin Netanyahu reagoi ashpër ndaj kësaj deklarate, duke e quajtur atë një “shpërblim të madh për Hamasin” dhe një shtysë për vazhdimin e dhunës.
“Nga Londra, Otava dhe Parisi, këta liderë po shpërblejnë një sulm gjenocidal kundër Izraelit dhe po ftojnë të tjera mizori si ajo e 7 tetorit,” tha Netanyahu, duke iu referuar sulmeve të Hamasit që nisën luftën në vitin 2023.
Netanyahu u kërkoi liderëve evropianë të ndjekin shembullin e ish-presidentit amerikan Donald Trump në mbështetje të Izraelit.
Ai përfundoi deklaratën duke e quajtur konfliktin “një luftë mes qytetërimit dhe barbarisë”, dhe tha se Izraeli do të vazhdojë të mbrohet “me mjete të drejta deri në fitoren totale”.